Të gjithë ne jetojmë prej vitesh jashtë vendit tonë, madje shumë prej nesh janë shkolluar dhe kanë marrë kulturë të huaj. Fëmijët tanë do të jenë fare pak të lidhur me vendlindjen dhe lidhjet do të zbehen derisa brezat e ardhshëm do të integrohen në një nënshtetësi të huaj. Shqipëria kurrë nuk u shua, por atë që nuk e bënë shekujt mund ta bëjë gjendja e keqe ekonomike e cila na ka detyruar të lëmë vendin tonë në kërkim të një jetese më të mirë. Mund të jemi të varfër, por duhet të jemi krenarë për historinë dhe kulturën e popullit tonë e cila mund të barazohet me atë të civilizimeve më të ndritura që ka patur historia mijëvjeçare e botës . Detyra e jonë është t'a ruajmë e t'a njohim trashëgiminë e pasur që na kanë lënë stërgjyshët tanë. Teknologjia na jep mundësinë që të hyjmë nëpërmjet internetit në çdo familje shqiptare. Ta shfrytëzojmë pra këtë mundësi që të mbajmë gjallë shkëndijat e shpirtit të shqiptarit. Po krijohet në internet një SHQIPËRI virtuale e cila do ti japë mundësi çdo shqiptari që t'i kalojë orët e tij të mallit në një ambjent krejtësisht shqiptar. Po ndërtohet një SHQIPËRI virtuale dhe projekti ynë është një ndër gurët e themelit të saj.

 Kush Jemi

Ne jemi një grup webmasterash dhe studentësh me eksperiencë disavjeçare në internet. I bashkuam risursat në një faqe të vetme sepse në këtë mënyrë informacioni do të ishte më i plotë dhe më i detajuar. Secili prej nesh ka dhënë kontributin e tij në shkallë dhe nivele të ndryshme me qëllimin e vetëm për të pasuruar sa më shumë paraqitjen e Shqipërisë në internet.

Materialet e publikuara në këtë faqe janë përpunuar dhe redaktuar me përgjegjësi deri në detaje, mjafton të përmendim përdorimin e shkronjave /ë/ dhe /ç/ të cilat edhe në faqet më të mirfillta të internetit shqiptar zëvendësohen padrejtësisht me /e/ dhe /c/.

 Financimi

Shpenzimet e kësaj faqeje interneti janë mbuluar nga vetë nismëtarët e projektit. E vetmja thirje që ne u bëjmë vizitorëve dhe anëtarëve të faqes është të japin kontributin e tyre në shtimin dhe pasurimin e materialeve që aktualisht disponojmë duke ia rritur edhe më shumë vlerat faqes. Çdo ndihmë e juaja është e mirëpritur...

 Arritjet

Albanian Network Group ka lidhur kontrata ekluziviteti me figurat më të shquara të artit dhe kulturës shqiptare. Shtëpitë Botuese dhe Shtëpitë Diskografike më të njohura në Shqipëri kanë zgjedhur grupin tonë për prezantimin apo tregtimin e veprave të tyre në internet. Përveç editorëve edhe individë të veçantë si këngëtarët e suksesshëm: Redon Makashi, Mira Konçi, Pirro Çako, Elton Deda, Lirio Nushi; kompozitori dhe orkestruesi më i njohur shqiptar, organizuesi i festivaleve dhe i koncerteve më të njohur në Shqipëri z. Shpëtim Saraçi; Sopranoja më e njohur shqiptare, zotëruesja e skenave operistike shqiptare për gati gjysëm shekulli zj. Edith Mihali, na kanë besuar ndërtimin, mirëmbajtjen dhe organizimin e faqeve të tyre zyrtare të internetit.

Grupi ynë është hallka që lidh shqiptarët kudo në botë me personalitetet më të shquara të artit dhe kulturës së vendit të tyre.